തൊടുപുഴ: കേരള വ്യാപാരി വ്യവസായി ഏകോപന സമിതി ജില്ലാ കമ്മിറ്റിയുടെ നേതൃത്വത്തിൽ ജില്ലാ വ്യാപാരോത്സവ് 15മുതൽ മാർച്ച് 31 വരെ നടക്കുമെന്ന് ഭാരവാഹികൾ പത്രസമ്മേളനത്തിൽ അറിയിച്ചു. ജനങ്ങളുടെ ഉത്സവം കൈനിറയെ സമ്മാനം എന്നതാണ് വ്യാപാരോത്സവത്തിലൂടെ ലക്ഷ്യമിടുന്നത്. സ്ഥാപനങ്ങളിൽനിന്നു നിശ്ചിത തുകയ്ക്ക് ഉത്പന്നങ്ങൾ വാങ്ങുവന്നവർക്ക് അതാതു കടകൾ പ്രത്യേക സമ്മാനങ്ങൾ നൽകും. ഇതിനു പുറമേ ബംപർ സമ്മാനമായി ഇന്നോവ ക്രിസ്റ്റ കാറും രണ്ടാം സമ്മാനമായി അഞ്ച് അസംബ്ലി മണ്ഡലങ്ങളിലും ഓരോ മാരുതി ആൾട്ടോ കാറും നൽകും.
പ്രതിമാസ നറുക്കെടുപ്പുകളിൽ ടെലിവിഷൻ, ഫ്രിഡ്ജ്, വാഷിംഗ് മെഷീൻ എന്നിവയും ദ്വൈവാര നറുക്കെടുപ്പുകളിൽ മിക്സി, പ്രഷർകുക്കർ, ഇൻഡക്ഷൻ കുക്കർ തുടങ്ങിയവയും സമ്മാനമായി വിതരണം ചെയ്യും. ഇന്നു തൊടുപുഴ മർച്ചന്റ് ട്രസ്റ്റ് ഹാളിൽ ചേരുന്ന ജില്ലാ കൗൺസിൽ യോഗത്തിൽ ജില്ലാ പ്രസിഡന്റ് സണ്ണി പൈംപിള്ളിൽ അധ്യക്ഷത വഹിക്കും.
സംസ്ഥാന സീനിയർ വൈസ് പ്രസിഡന്റ് അബ്ദുൾ ഹമീദ് പൊതുയോഗത്തിന്റെ ഉദ്ഘാടനവും കുടുംബസുരക്ഷാനിധിയുടെ വിതരണവും നിർവഹിക്കും. ജില്ലാ വർക്കിംഗ് പ്രസിഡന്റ് കെ.ആർ. വിനോദ് വിഷയാവതരണം നടത്തും. തൊടുപുഴ ഡിവൈഎസ്പി പി.കെ. സാബു വ്യാപാരോത്സവം ഉദ്ഘാടനം ചെയ്യും. ട്രേഡേഴ്സ് വെൽഫയർ സൊസൈറ്റി ചെയർമാൻ ഡയസ് ജോസ്, ജനറൽ സെക്രട്ടറി നജീബ് ഇല്ലത്തുപറന്പിൽ, ആർ. രമേശ് എന്നിവർ പ്രസംഗിക്കും.
ചടങ്ങിൽ വെള്ളപ്പൊക്കത്തിൽ നഷ്ടം നേരിട്ട വ്യാപാരികൾക്ക് ദുരിതാശ്വാസ ഫണ്ട് വിതരണം ചെയ്യും. പത്രസമ്മേളനത്തിൽ ജില്ലാ പ്രസിഡന്റ് സണ്ണി പൈംപിള്ളിൽ, ജനറൽ സെക്രട്ടറി നജീബ് ഇല്ലത്തുപറന്പിൽ, വ്യാപാരോത്സവ് ചെയർമാൻ കെ.ആർ. വിനോദ്, തൊടുപുഴ മർച്ചന്റ്സ് അസോസിയേഷൻ പ്രസിഡന്റ് രാജു തരണിയിൽ എന്നിവർ പങ്കെടുത്തു.