നെടുങ്കണ്ടം: നെടുങ്കണ്ടം പഞ്ചായത്തിലെ ഫയലുകളും റിക്കാർഡ് ബുക്കുകളും മുന് ഭരണസമിതി സംരക്ഷിക്കാത്തതിനെത്തുടര്ന്ന് നശിച്ചുപോയതായി ആക്ഷേപം. പഞ്ചായത്തിന് ഐഎസ്ഒ സര്ട്ടിഫിക്കറ്റ് ലഭിക്കുന്നതിനായി 2015 - 20 ഭരണസമിതിയുടെ കാലത്ത് റിക്കാര്ഡുകളും ഫയലുകളും നമ്പരിട്ട് പ്രത്യേക മുറിയില് ഫയല് റാക്കുകളില് സുരക്ഷിതമായി സൂക്ഷിച്ചിരുന്നു.
കഴിഞ്ഞ ഭരണസമിതിയുടെ കാലത്ത് ഈ മുറിയില് ചോര്ച്ചയുണ്ടായതോടെ ഇവ പഴയ ലൈബ്രറി ഹാളിലേക്കു മാറ്റുകയായിരുന്നു. മതിയായ സംരക്ഷണമില്ലാതെ വലിച്ചുവാരിയിട്ട ഫയലുകളും റിക്കാർഡുകളും വെള്ളം കയറിയും പൊടിപിടിച്ചും നശിക്കുകയായിരുന്നു.
കഴിഞ്ഞ ഭരണസമിതിയും ഉദ്യോഗസ്ഥരും ഫയലുകള് സംരക്ഷിക്കാന് യാതൊരു നടപടിയും സ്വീകരിച്ചില്ലെന്ന് വൈസ് പ്രസിഡന്റ് ശ്യാമള വിശ്വനാഥന് പറഞ്ഞു. മുന് ഭരണസമിതിയുടെ കെടുകാര്യസ്ഥത മൂലം ഡിജിറ്റലൈസേഷന് മുന്പുള്ള ഒരു ഫയലും വീണ്ടെടുക്കാനാകാത്ത വിധം നശിച്ചുപോയതായും ഇവര് ആരോപിച്ചു.