അപകടത്തിൽപ്പെട്ട കാർ.
മൂലമറ്റം: വിനോദസഞ്ചാരികളുടെ കാർ നിയന്ത്രണംവിട്ട് 30 അടി താഴ്ചയിലേക്കു മറിഞ്ഞ് നാലു യുവാക്കൾക്കു പരിക്ക്. കാഞ്ഞാർ പുള്ളിക്കാനം റോഡിൽ കുമ്പങ്ങാനത്താണ് സംഭവം. വെള്ളിയാഴ്ച രാവിലെ എട്ടിന് ഇരിങ്ങാലക്കുട സ്വദേശികളായ അർജുൻ (22), ബെർണാർഡ് (22), കൃഷ്ണൻകുട്ടി (24), രാജ് സാൻ (24) എന്നിവർക്കാണ് പരിക്കേറ്റത്. ഇവർ വാഗമൺ സന്ദർശിച്ച് തിരിച്ചുവരുമ്പോഴാണ് അപകടം.
വിരമറിഞ്ഞ് മൂലമറ്റം ഫയർഫോഴ്സ് സ്ഥലത്തെത്തിയപ്പോൾ യുവാക്കൾ കാറിൽ കുടുങ്ങിക്കിടക്കുകയായിരുന്നു. ഫയർഫോഴ്സും നാട്ടുകാരും ചേർന്ന് യുവാക്കളെ രക്ഷപ്പെടുത്തി. ഇരിങ്ങാലക്കുട സ്വദേശി ജിജോ കോച്ചേരിയുടെ കാർ വാടകയ്ക്കെടുത്ത് വാഗമൺ സന്ദർശിക്കാനെത്തിയതാണ് യുവാക്കൾ. കാഞ്ഞാർ പോലീസും സംഭവസ്ഥലത്തെത്തി മേൽനടപടികൾ സ്വീകരിച്ചു. കാർ ഭാഗികമായി തകർന്നു. യുവാക്കളുടെ പരിക്ക് ഗുരുതരമല്ല.