കൊല്ലം: മദ്യപിച്ച് കെഎസ്ആർടി സി ബസിൽ കയറി അഭ്യാസം കാണിച്ചാൽ പിടി വീഴുമെന്ന് ഗതാഗത മന്ത്രി കെ.ബി. ഗണേഷ് കുമാർ. അത്തരക്കാരെ അടുത്ത പോലീസ് സ്റ്റേഷനിൽ എത്തിക്കാൻ കണ്ടക്ടർക്ക് നിർദേശം നൽകിയിട്ടുണ്ടെന്ന് മന്ത്രി കെ.ബി. ഗണേഷ് കുമാർ പത്തനാപുരത്ത് പറഞ്ഞു.
പുകവലി ചോദ്യം ചെയ്ത പെൺകുട്ടിയെ ട്രെയിനിൽ നിന്നും ചവിട്ടി തള്ളിയിട്ട സംഭവത്തി െ ന്റ പശ്ചാത്തലത്തിൽ മാധ്യമപ്രവർത്തകരുടെ ചോദ്യത്തോട് പ്രതികരിക്കുകയായിരുന്നു മന്ത്രി. മദ്യപിച്ച കാരണം കൊണ്ട് ആരെയും ബസിൽകയറ്റാതിരിക്കാൻ കഴിയില്ല. എന്നാൽ മദ്യപിച്ച് സഹയാത്രക്കാരോടോ സ്ത്രീകളോടോ അപമര്യാദയായി പെരുമാറിയാൽ ആർക്കും കണ്ടക്ടറോട് റിപ്പോർട്ട് ചെയ്യാം. അവരെ അടുത്ത പൊലീസ് സ്റ്റേഷനിൽ എത്തിക്കാൻ കണ്ടക്ടർമാർക്ക് നിർദേശം നൽകിയിട്ടുള്ളതായി കെ.ബി.ഗണേഷ്കുമാർ പറഞ്ഞു.
പുകവലിച്ചു കൊണ്ട് അടുത്തെത്തിയാളോട് മാറി നിന്നില്ലെങ്കിൽ പരാതിപ്പെടുമെന്ന് പറഞ്ഞതിന് വർക്കലയിൽ ട്രെയിനിൽ നിന്ന് പെൺകുട്ടിയെ ചവിട്ടി വീഴ്ത്തിയ സംഭവം നടന്നത് രണ്ടു ദിവസം മുൻപായിരുന്നു. കെഎസ്ആർടി സിയിലും സമാനസംഭവങ്ങൾ നടക്കുന്നുണ്ട്.രണ്ടു മാസം മുൻപാണ് കൊല്ലത്ത് സഹയാത്രികയോട് ഒരാൾ നഗ്നത പ്രദർശിപ്പിച്ച് അറസ്റ്റിലാവുന്നത്.
Tags : KSRTC Local News Kollam Nattuvishesham