പാലാ: ചലഞ്ചേഴ്സ് ബാസ്കറ്റ്ബോള് ക്ലബ്, കേരള ബാസ്കറ്റ്ബോള് അസോസിയേഷന്റെ ആഭിമുഖ്യത്തില് സ്റ്റാര്ട്ടിംഗ് ഫൈവ് സ്പോര്ട്ട്സ് മാനേജ്മെന്റിന്റെ പിന്തുണയോടെ, പാലായിലെ അല്ഫോന്സ കോളജ് ഇന്ഡോര് സ്റ്റേഡിയത്തില് നടക്കുന്ന 50-ാമത് കേരള സംസ്ഥാന ജൂണിയര് പുരുഷ-ജൂണിയര് വനിതാ ബാസ്കറ്റ്ബോള് ചാമ്പ്യന്ഷിപ്പിലെ ലീഗ് മത്സരങ്ങള് ഇന്നു രാവിലെ സമാപിക്കും. തുടര്ന്നു പുരുഷ ക്വാര്ട്ടര് ഫൈനല് മത്സരങ്ങള് വൈകുന്നേരം ആരംഭിക്കും.
പുരുഷ വിഭാഗത്തില് നിലവിലെ ചാമ്പ്യന്മാരായ തൃശൂരും കഴിഞ്ഞ വര്ഷത്തെ റണ്ണേഴ്സ് അപ്പായ കോട്ടയവും അതത് ഗ്രൂപ്പുകളില് തുടര്ച്ചയായ രണ്ടാം വിജയം നേടി ക്വാര്ട്ടര് ഫൈനല് ഉറപ്പിച്ചിട്ടുണ്ട്. വനിത വിഭാഗത്തില് തൃശൂര്, എറണാകുളം, തിരുവനന്തപുരം, ആലപ്പുഴ, കോഴിക്കോട്, കണ്ണൂര് ടീമുകള് ക്വാര്ട്ടറില് സ്ഥാനം നേടിയിട്ടുണ്ട്.
ഇന്നലെ നടന്ന ലീഗ് മത്സരങ്ങളില് വനിതാ വിഭാഗത്തില് കൊല്ലം-കാസര്ഗോഡിനെയും (38-14 ), കണ്ണൂര്-പാലക്കാടിനെയും (45- 42), എറണാകുളം-വയനാടിനെയും (69-15) തിരുവന്തപുരം -പത്തനംതിട്ടയെയും (49-4) കണ്ണൂര് -പാലക്കാടിനെയും(45-42), കോഴിക്കോട്-കണ്ണൂരിനെയും (59-19) മലപ്പുറം -കൊല്ലത്തെയും (55-50) തോല്പ്പിച്ചു.
പുരുഷന്മാരുടെ വിഭാഗത്തില് എറണാകുളം-കാസര്ഗോഡിനെയും (70-26), കോഴിക്കോട്-ഇടുക്കിയെയും (76-56), കോട്ടയം- കോഴിക്കോടിനെയും (76-47), കണ്ണൂര്-കാസര്ഗോഡിനെയും (38-17), ഇടുക്കി -മലപ്പുറത്തിനെയും (63-52), ആലപ്പുഴ-തിരുവനന്തപുരത്തെയും (67-55) തിരുവനന്തപുരം-വയനാടിനെയും (56-26) പരാജയപ്പെടുത്തി.