തൊടുപുഴ: കേരള ഗസറ്റഡ് ഓഫീസേഴ്സ് അസോസിയേഷന്റെ ഏഴാമത് സംസ്ഥാന കലാമേളയ്ക്ക് തൊടുപുഴ അല് അസര് കോളേജില് തിരിതെളിഞ്ഞു. ചലച്ചിത്രതാരം അനാര്ക്കലി മരക്കാര് ഉദ്ഘാടനം ചെയ്തു. കെജിഒഎ സംസ്ഥാന പ്രസിഡന്റ് ഡോ. എസ്.ആര്. മോഹനചന്ദ്രന് അധ്യക്ഷത വഹിച്ചു. സംസ്ഥാന ജനറല് സെക്രട്ടറി എം. ഷാജഹാന്, സംസ്ഥാന ട്രഷറര് എ. ബിന്ദു, സംഘാടകസമിതി ചെയര്പേഴ്സണ് കെ.പി. മേരി, അല് അസര് കോളേജ് ചെയര്മാന് കെ.എം. മൂസ, പ്രിന്സിപ്പല് കെ.എ. ഖാലിദ്, കെജിഒഎ സംസ്ഥാന സെക്രട്ടറി ജയന് പി. വിജയന്, ജില്ലാ സെക്രട്ടറി അബ്ദുല് സമദ്, ജില്ലാ പ്രസിഡന്റ് ബിജു സെബാസ്റ്റ്യന് എന്നിവര് പ്രസംഗിച്ചു.
ജില്ലാ സാംസ്കാരിക വേദിയായ സര്ഗകലാവേദി സംഗീത നൃത്തശില്പം അവതരിപ്പിച്ചു. കലാമേള ഇന്നു വൈകുന്നേരം സമാപിക്കും. സമാപനയോഗത്തില് പ്രശസ്ത സിനിമാ സംവിധായകന് മിഥുന് മാനുവല് തോമസ് മുഖ്യാതിഥിയായിയിരിക്കും. ആദ്യദിവസം തൃശൂര് ജില്ല 61 പോയിന്റുമായി ഒന്നാം സ്ഥാനത്താണ്. 57 പോയിന്റുകളുമായി തിരുവനന്തപുരം സൗത്ത് തൊട്ടുപിന്നിലുണ്ട്. വനിതകളുടെ ലളിതഗാന മത്സരത്തില് കൊല്ലം ജില്ലയിലെ ശ്രുതി സിംഗ്, പാലക്കാട് ജില്ലയിലെ എം. ദിവ്യ എന്നിവര് ഒന്നാം സ്ഥാനം പങ്കുവച്ചു.
പുരുഷന്മാരുടെ മാപ്പിളപ്പാട്ട് മത്സരത്തില് പി.എം. സമീം (കണ്ണൂര്) വിജയിച്ചു. ഒപ്പനയില് മലപ്പുറം ജില്ല ഒന്നാം സ്ഥാനവും വയനാട്, എറണാകുളം ജില്ലകള് രണ്ടാം സ്ഥാനവും കരസ്ഥമാക്കി. ഇന്നു നാടോടി നൃത്തം, തിരുവാതിര, സംഘനൃത്തം, സിനിമാഗാനം, ലളിതഗാനം മിമിക്രി തുടങ്ങിയ ഇനങ്ങളില് മത്സരങ്ങള് നടക്കും.
Tags : nattu vishesham KGOA returns