വൈക്കം: ഉദയനാപുരം പടിഞ്ഞാറെക്കരയിൽ അമ്മയെയും മകനെയും വീട്ടിൽ തൂങ്ങിമരിച്ച നിലയിൽ കണ്ടെത്തി. പടിഞ്ഞാറേക്കര തേവലക്കാട്ടിൽ തങ്കമ്മ(68), മകൻ സുനിൽ (46) എന്നിവരെയാണ് കിടപ്പുമുറിയിൽ തൂങ്ങിമരിച്ച നിലയിൽ കണ്ടത്.
കഴിഞ്ഞ രാത്രി തങ്കമ്മയ്ക്ക് തലവേദനയായിരുന്നതിനാൽ അയൽവാസിയായ സ്ത്രീ വിവരങ്ങൾ തിരക്കിയിരുന്നു. രാത്രി വൈകിയും വീട്ടിൽ ലൈറ്റ് കണ്ട് ഫോൺ ചെയ്തപ്പോൾ സുനിൽ ഫോൺ എടുത്തിരുന്നതായും പറയുന്നു. അമ്മ ഉറങ്ങിയെന്നാണ് സുനിൽ പറഞ്ഞത്.
രാവിലെ ക്ഷേത്രത്തിൽ പോകാൻ വിളിക്കാനായി അയൽവാസിയായ സ്ത്രീ ഇവരുടെ വീട്ടിലെത്തിയപ്പോഴാണ് രണ്ടുപേരെയും തൂങ്ങിയ നിലയിൽ കണ്ടത്. വീട്ടിൽനിന്ന് പോലീസിനു ലഭിച്ച ആത്മഹത്യാക്കുറിപ്പിൽ അമ്മയെ കൂടെ കൊണ്ടുപോകുന്നെന്ന് പരാമർശിച്ചിട്ടുണ്ട്.
സുനിലിന് കാന്തല്ലൂരിലുള്ള ഒരാളുമായി ചേർന്ന് ചില ബിസിനസുകൾ ഉണ്ടായിരുന്നതായി പൊലീസിന് സൂചന ലഭിച്ചിട്ടുണ്ട്.തങ്കമ്മ ഏറെക്കാലമായി രോഗിയായിരുന്നു. സുനിൽ അവിവാഹിതനാണ്. വൈക്കം ഡിവൈഎസ്പി പി.എസ്. ഷിജുവിന്റെ നേതൃത്വത്തിൽ പൊലീസ് സ്ഥലത്തെത്തി പരിശോധന നടത്തി.
കോട്ടയത്തുനിന്ന് ഫോറൻസിക് സംഘവും എത്തിയിരുന്നു
Tags : nattu vishesham Mother and son dead