മാനന്തവാടി: കൊയിലേരി ഉദയ വായനശാലയുടെ 20-ാമത് ഉദയ ഫുട്ബോൾ ടൂർണമെന്റ് 16 മുതൽ ഫെബ്രുവരി ഒന്നു വരെ മാനന്തവാടി വളളിയൂർക്കാവ് ഗ്രൗണ്ടിൽ നടത്തപ്പെടും.
ഫുട്ബോൾ ആരാധകർക്ക് സൗജന്യപ്രവേശനം നൽകുന്ന ടൂർണമെന്റിൽ ഈ വർഷം കോഴിക്കോട്, മലപ്പുറം, കണ്ണൂർ, വയനാട് ജില്ലകളിൽ നിന്നുള്ള മികച്ച ക്ലബുകൾ അണിനിരക്കും. മലയാളി വ്യവസായിയും റിഷി ഗ്രൂപ്പ് ചെയർമാനുമായ ജോസഫ് ഫ്രാൻസിസ് വടക്കേടത്താണ് ടൂർണമെന്റിന്റെ മുഖ്യ സ്പോണ്സർ.
രണ്ട്പതിറ്റാണ്ടായി നടത്തിവരുന്ന ഉദയ ഫുട്ബോളിൽകൂടി ഒട്ടനവധി ജീവകാരുണ്യ പ്രവർത്തനങ്ങൾ നടത്തി. ഈ വർഷം ജീവകാരുണ്യ പ്രവർത്തനങ്ങൾക്ക് പുറമെ കാണികൾക്കും നറുക്കെടുപ്പിലൂടെ സമ്മാനങ്ങൾ നൽകും.
വിജയികൾക്ക് വടക്കേടത്ത് മൈക്കിൾ ഫ്രാൻസിസ്, മറിയം മൈക്കിൾ എന്നിവരുടെ സ്മരണാർഥം വിവിധ തലങ്ങളിലായി ഒരു ലക്ഷം രൂപ പ്രൈസ്മണിയും നൽകും. മുരളീദാസ് ആയിപ്പൊയിൽ ചെയർമാനായും കമ്മന മോഹനൻ ജനറൽ കണ്വീനറുമായി 51 അംഗ കമ്മിറ്റിയാണ് ടൂർണമെന്റ് ഒരുക്കുന്നത്. ടൂർണമെന്റിന്റെ പോസ്റ്റർ പ്രകാശനം പട്ടികജാതി-വർഗ-പിന്നാക്ക ക്ഷേമ മന്ത്രി ഒ.ആർ. കേളു നിർവഹിച്ചു. ബാബു ഫിലപ്പ്, ഷാജി തോമസ്, കുഞ്ഞാപ്പ വിൻസ്പോട്ട്, മാവറ വർക്കി, പി.സി. ജോണ് തുടങ്ങിയവർ പങ്കെടുത്തു. ഫോണ്: 9048040076, 9447682472.