ഓയിസ്ക ഇന്റർ നാഷണലും, ആരാമം സ്വയംസഹായ സംഘടനയും ചേർന്ന് നെല്ലിപ്പൊയിൽ വില്ലേജ് ഓഫീസിലേക്ക് നടത്തിയ മാർച്ച്.
കോടഞ്ചേരി:നെല്ലിപ്പൊയിൽ വില്ലേജിനെ പൂർണമായും ഒരു വനാധിഷ്ടിത വില്ലേജാക്കി മാറ്റി റെഡ് കാറ്റഗറിയിൽ ഉൾപ്പെടുത്താൻ ചിലർ നൽകിയ അപേക്ഷയിൽ സർക്കാർ പ്രാഥമിക നടപടികൾ ആരംഭിച്ചതിൽ പ്രതിഷേധിച്ച് നെല്ലിപ്പൊയിൽ വില്ലേജ് ഓഫീസിലേക്ക് മാർച്ച് സംഘടിപ്പിച്ചു.
നെല്ലിപ്പൊയിൽ ഓയിസ്ക ഇന്റർ നാഷണലും ആരാമം സ്വയംസഹായ സംഘടനയും ചേർന്നാണ് പ്രതിഷേധ മാർച്ച് സംഘടിപ്പിച്ചത്. നെല്ലിപ്പൊയിൽ വില്ലേജിലെ എട്ട്, ഒന്പത്, പതിനൊന്ന് വാർഡുകൾ കോടഞ്ചേരി വില്ലേജിൽ ചേർക്കുവാനും പകരം കോടഞ്ചേരി വില്ലേജിലെ ഒന്ന്, രണ്ട്, മൂന്ന് വാർഡുകൾ നെല്ലിപ്പൊയിൽ വില്ലേജിൽ ലയിപ്പിച്ച് വില്ലേജ് അതിർത്തികൾ പുനക്രമീകരിക്കാനാണ് ശ്രമം നടക്കുന്നത്.
വില്ലേജ് പുനക്രമീകരണ പ്രാഥമിക നടപടികൾ അടിയന്തരമായി നിർത്തിവയ്ക്കണമെന്നും മേൽവിഷയത്തിൽ ജനങ്ങളുടെ ആശങ്ക അകറ്റണമെന്നും യോഗം ആവശ്യപ്പെട്ടു. ആരാമം സ്വയം സഹായ സംഘം പ്രസിഡന്റ് ജോയി നൂറാനാനിയിൽ മാർച്ച് ഉദ്ഘാടനം ചെയ്തു.
ഓയിസ്ക പ്രസിഡന്റ് സാബു അവണൂർ അധ്യക്ഷനായി. പഞ്ചായത്ത് അംഗം വിൽസൺ തറപ്പേൽ, ജോസഫ് മൂത്തേടത്ത്, പോൾസൺ അറക്കൽ, ജോസ് ഐരാറ്റിൽ, ആന്റണി നീർവേലിൽ, സണ്ണി തടത്തേൽ, സേവ്യർ കിഴക്കേകുന്നേൽ, സിബി അവണ്ണൂർ, ഓയിസ്ക ട്രഷറർ ജിജി കുരുവിക്കടയിൽ എന്നിവർ പ്രസംഗിച്ചു.
Tags : Local News Nattuvishesham Kozhikode