ചങ്ങനാശേരി: സമൂഹമാധ്യമങ്ങളുടെ ഉപയോഗത്തെക്കുറിച്ച് കുട്ടികളിൽ അവബോധം സൃഷ്ടിക്കാൻ അധ്യാപകർക്കു കഴിയണമെന്ന് ചങ്ങനാശേരി ആര്ച്ച്ബിഷപ് മാർ തോമസ് തറയില്. കേരള കാത്തലിക് ടീച്ചേഴ്സ് ഗില്ഡ് സംസ്ഥാന സമ്മേളനത്തിനു തുടക്കംകുറിച്ചു കുന്നന്താനം സെഹിയോനില് നടന്ന പ്രതിനിധി സമ്മേളനം ഉദ്ഘാടനംചെയ്തു പ്രസംഗിക്കുകയായിരുന്നു ആർച്ച്ബിഷപ്.
അധ്യാപനത്തെ തൊഴില് മാത്രമായി കാണാതെ ദൈവനിയോഗമായി കണ്ട് വിദ്യാര്ഥികളുടെ ആത്മീയവും ഭൗതികവുമായ വളര്ച്ചക്കായി പ്രവര്ത്തിക്കാന് അധ്യാപക സമൂഹത്തിനു കഴിയണമെന്നും മാർ തോമസ് തറയില് പറഞ്ഞു. ന്യൂനപക്ഷ അവകാശപോരാളിയെന്ന പേരിലറിയപ്പെടുന്ന ആര്ച്ച്ബിഷപ് മാര് ജോസഫ് പവ്വത്തലിന്റെ കബറിടത്തില്നിന്ന് ഛായാചിത്ര പ്രയാണം ആരംഭിച്ചതോടെയാണ് സമ്മേളനത്തിന് തുടക്കമായത്.
തിരുവല്ല ആര്ച്ച്ബിഷപ് തോമസ് മാര് കൂറിലോസ് പതാക സംസ്ഥാന പ്രസിഡന്റ് ടോം മാത്യുവിന് കൈമാറി ഫ്ളാഗ്ഓഫ് ചെയ്തു. പ്രയാണം കുന്നന്താനം സെഹിയോനില് എത്തിച്ചേര്ന്നതോടെ സംസ്ഥാന പ്രസിഡന്റ് ടോം മാത്യു പതാക ഉയര്ത്തി.
സംസ്ഥാന വൈസ് പ്രസിഡന്റ് സി.എ. ജോണി അധ്യക്ഷത വഹിച്ചു. ഡോ. അജു കെ. നാരായണന് സെമിനാര് നയിച്ചു. സംസ്ഥാന ഡയറക്ടര് ഫാ. ആന്റണി അറയ്ക്കല്, ചങ്ങനാശേരി അതിരൂപത വികാരിജനറാള് മോണ്. സ്കറിയ കന്യാകോണില്, കോര്പ്പറേറ്റ് മാനേജര് ഫാ.ജോബി മൂലയില്, ഡോ. ജിഷമോള് അലക്സ്, കെ.ജി. സാബു, സി.ജെ. ആന്റണി, സുബാഷ് മാത്യു, ബിജു പി.ആന്റണി എന്നിവര് പ്രസംഗിച്ചു.
Tags : Mar Thomas Tharayil social media Children made aware