തൊടുപുഴ: കേരള കോണ്ഗ്രസ് ചെയര്മാനും മുന് മന്ത്രിയുമായ പി.ജെ.ജോസഫ് നിയമസഭാ തെരഞ്ഞെടുപ്പില് ഇത്തവണയും തൊടുപുഴയില്നിന്നു ജനവിധി തേടുമെന്ന് ഉറപ്പായി.
മകന് അപു ജോണ് ജോസഫ് സ്ഥാനാര്ഥിയാകുമെന്ന് അഭ്യൂഹം നിലനില്ക്കെയാണ് പി.ജെ. തന്റെ സ്ഥാനാര്ഥിത്വം സംബന്ധിച്ച് അനിശ്ചിതത്വത്തിന് വിരാമമിട്ടത്.
മുതിര്ന്ന നേതാവെന്ന നിലയില് ഇദ്ദേഹം മല്സരരംഗത്തുവരുന്നത് യുഡിഎഫിന് പൊതുവേ ഗുണംചെയ്യുമെന്ന വിലയിരുത്തലാണ് വീണ്ടും മല്സരിക്കാന് അദ്ദേഹത്തെ പ്രേരിപ്പിച്ചതെന്നാണ് സൂചന.
12-ാം തവണയാണ് പി.ജെ. തൊടുപുഴയില്നിന്നു നിയമസഭയിലേക്ക് മല്സരിക്കാന് തയാറെടുക്കുന്നത്. അതേ സമയം പാര്ട്ടി മല്സരിക്കുന്ന മറ്റു മണ്ഡലങ്ങളിലെ സ്ഥാനാര്ഥികളെ സംബന്ധിച്ച് തീരുമാനമായിട്ടില്ല. കോണ്ഗ്രസുമായി നടത്തുന്ന ഉഭയകക്ഷി ചര്ച്ചകള്ക്കു ശേഷമാകും ഇതു സംബന്ധിച്ച് തീരുമാനത്തിലെത്തുക.
Tags : P.J. Joseph Thodupuzha Kerala Congress Candidate Niyamasabha election