കൊച്ചി: ഉദയംപേരൂരില്‍ തെരുവുനായ ശല്യത്തിന് പ്രതിരോധ നടപടികളുമായി അധികൃതര്‍. പ്രദേശത്ത് എട്ടു തെരുവുനായകള്‍ക്കു കഴിഞ്ഞ ദിവസം പ്രതിരോധ കുത്തിവയ്പ്പ് നല്‍കി. കൂടുതല്‍ നായകള്‍ക്കു വാക്‌സിന്‍ നല്‍കാന്‍ നാളെ മുതല്‍ വാക്‌സിനേഷന്‍ കാമ്പയ്ന്‍ നടത്തും. പേവിഷബാധയേറ്റ തെരുവുനായ കടിച്ച വളര്‍ത്തു നായയെ വെറ്റിനറി അധികൃതര്‍ പിടികൂടി നിരീക്ഷണത്തിലാക്കി.

പ്രദേശവാസികള്‍ ജാഗ്രത പുലര്‍ത്താനും വളര്‍ത്തുമൃഗങ്ങള്‍ക്കോ തെരുവുനായകള്‍ക്കോ അസ്വാഭാവികമായ പെരുമാറ്റം കണ്ടാല്‍ പഞ്ചായത്തിലോ വെറ്റിനറി ആശുപത്രിയിലോ വിവരം അറിയിക്കണമെന്നും അധികൃതര്‍ അറിയിച്ചിട്ടുണ്ട്. അതേസമയം, കഴിഞ്ഞ ദിവസങ്ങളില്‍ കുഞ്ഞിനെയും വീട്ടമ്മയെയും അടക്കം എട്ടോളം പേരെ തെരുവുനായ ആക്രമിച്ചിരുന്നു.

വീടിന്‍റെ മുറ്റമടിക്കുന്നതിനിടെയാണ് വീട്ടമ്മയായ സതിയുടെ തല തെരുവുനായ കടിച്ചു കീറിയത്. ഇവര്‍ ഇപ്പോഴും ചികിത്സയിലാണ്. അങ്കണവാടിയില്‍ നിന്നും വരികയായിരുന്ന നാലു വയസുകാരന്‍ ഭുവനേശര്‍, അറുപതുകാരിയായ അന്നമ്മ ഈശപ്പന്‍, പന്ത്രണ്ടു വയസുകാരന്‍ ആരോണ്‍ എന്നിവര്‍ക്കും കടിയേറ്റിരുന്നു.

Tags : Stray dog ​​Attack Vaccination Udayamperoor