കാർവാർ: കർണാടകയിൽ അധികാരമാറ്റം ഉണ്ടാകുമോയെന്ന വിഷയത്തിൽ പ്രസ്താവന നടത്താൻ തയാറല്ലെന്നും കോൺഗ്രസ് ഹൈക്കമാൻഡിന്റെ മേൽനോട്ടത്തിൽ മുഖ്യമന്ത്രി സിദ്ധരാമയ്യയുമായി ധാരണയുണ്ടാക്കിയിട്ടുള്ളതാണെന്നും ഉപമുഖ്യമന്ത്രി ഡി.കെ. ശിവകുമാർ പറഞ്ഞു.
സിദ്ധരാമയ്യ മുഖ്യമന്ത്രിക്കസേരയിൽ ഇരിക്കുന്നത് ഹൈക്കമാൻഡിന്റെ തീരുമാനപ്രകാരമാണെന്നും അദ്ദേഹത്തിന്റെ കാലാവധിയെ സംബന്ധിച്ച് താൻ ഇതുവരെ പരാമർശങ്ങൾ നടത്തിയിട്ടില്ലെന്നും ശിവകുമാർ കൂട്ടിച്ചേർത്തു.
“മാധ്യമങ്ങളാണ് അധികാരമാറ്റത്തെക്കുറിച്ച് സംസാരിക്കുന്നത്. ഞങ്ങൾക്കിടയിൽ അങ്ങനെയൊരു ചർച്ചയില്ല. പാർട്ടി പറയുന്നത് അനുസരിക്കും”- ഉത്തര കന്നഡ ജില്ലയിൽ ക്ഷേത്ര ദർശനത്തിനെത്തിയ ശിവകുമാർ മാധ്യമങ്ങളോട് പ്രതികരിച്ചു.
രണ്ടരവർഷം മാത്രമായിരിക്കും തന്റെ കാലാവധിയെന്ന് ഒരിക്കലും പറഞ്ഞിട്ടില്ലെന്ന് വടക്കൻ കർണാടകയുടെ വികസനത്തെക്കുറിച്ച് നിയമസഭയിൽ നടന്ന ചർച്ചാവേളയിൽ സിദ്ധരാമയ്യയും പറഞ്ഞു.
Tags : Shivakumar understanding Siddaramaiah