ഷിക്കാഗോ: ഇന്ത്യക്ക് പുറത്ത് സ്ഥാപിതമായ ആദ്യ സീറോമലബാർ രൂപതയായ ഷിക്കാഗോ സീറോ മലബാർ രൂപത സിൽവർ ജൂബിലി നിറവിൽ. ജൂബിലി ആഘോഷങ്ങളുടെ ഭാഗമായി 2026 ജൂലൈ 9, 10, 11, 12 തീയതികളിൽ ഷിക്കാഗോയിൽ നടക്കുന്ന കൺവൻഷന് വിശ്വാസികളിൽ നിന്ന് മികച്ച പ്രതികരണമാണ് ലഭിക്കുന്നതായി സംഘാടകർ അറിയിച്ചു.
മാർ ജേക്കബ് അങ്ങാടിത്ത്, മാർ ജോയ് ആലപ്പാട്ട് എന്നിവരുടെ നേതൃത്വത്തിലായിരുന്നു രൂപതയുടെ 25 വർഷത്തെ വളർച്ച. നിലവിൽ 54 ഇടവകകളും 35 മിഷനുകളുമുള്ള ഷിക്കാഗോ രൂപതയിൽ എഴുപതിൽപ്പരം വൈദികർ ഏതാണ്ട് ഒരു ലക്ഷത്തോളും വരുന്ന വിശ്വാസികൾക്കായി സേവനം ചെയ്തുവരുന്നു. കൂടാതെ, ഇരുപതോളം വൈദികർ പാർട്ട്ടൈമായും സേവനം ചെയ്തുന്നു.
സിൽവർ ജൂബിലിയുടെ ഭാഗമായി വിവിധ സമ്മേളനങ്ങൾ സംഘടിപ്പിക്കും ഈ മാസം 18, 19 തീയതികളിൽ മയാമിയിൽ വച്ച് വൈദിക സമ്മേളനവും 2026 ഏപ്രിൽ 17, 18 തീയതികളിൽ ഷിക്കാഗോയിൽ വച്ച് സന്യസ്തരുടെ സമ്മേളനവും നടക്കും.
സിൽവർ ജൂബിലി ആഘോഷങ്ങളുടെ പ്രധാന ഭാഗമായ സീറോമലബാർ കൺവൻഷൻ 2026 ജൂലൈ 9, 10, 11, 12 തീയതികളിൽ ഷിക്കാഗോയിലെ പ്രശസ്തമായ മക്കോർമിക് പ്ലേസ് കൺവൻഷൻ സെന്ററിൽ നടക്കും.
ഈ കൺവൻഷനോടൊപ്പം രൂപതയുടെ പ്രഥമ മെത്രാൻ മാർ ജേക്കബ് അങ്ങാടിയത്തിന്റെ മെത്രാഭിഷേക ജൂബിലിയും ആഘോഷിക്കും. ഈ ആത്മീയ, സാംസ്കാരിക, പൈതൃക സംഗമത്തിൽ സകുടുംബം പങ്കെടുക്കുവാൻ രൂപതാ അധ്യക്ഷൻ മാർ ജോയ് ആലപ്പാട്ടും ജൂബിലി കമ്മിറ്റി ജനറൽ കൺവീനർ ഫാ. ജോൺ മേലേപ്പുറവും ജൂബിലി കമ്മിറ്റി ചെയർമാൻ ജോസഫ് ചാമക്കാലയും എല്ലാ വിശ്വാസികളെയും ക്ഷണിച്ചിട്ടുണ്ട്.
ഹോട്ടൽ ബുക്കിംഗിൽ പ്രത്യേക ഇളവ് ലഭിക്കുന്നതിനായി ഡിസംബർ 31 വരെ രജിസ്റ്റർ ചെയ്യുന്നവർക്ക് അവസരമുണ്ട്. ഈ അവസരം എല്ലാവരും ഉപയോഗിക്കണമെന്ന് കൺവൻഷൻ കമ്മിറ്റി ജനറൽ കൺവീനർ ഫാ. തോമസ് കടുകപ്പള്ളി, ചെയർമാൻ ബിജി സി. മാണി എന്നിവർ അഭ്യർഥിച്ചു.
കൺവൻഷനെ കുറിച്ചു കൂടുതൽ അറിയുവാനും രജിസ്റ്റർ ചെയ്യുവാനും താഴെ പറയുന്ന വെബ്സൈറ്റ് സന്ദർശിക്കുക: www.syroconvention.org