ന്യൂയോർക്ക്: വടക്കെ അമേരിക്കയിലെ മലയാളി സംഘടനകളുടെ കേന്ദ്ര സംഘടനയായ ഫൊക്കാനയുടെ 22-ാമത് ഇന്റർനാഷണൽ കൺവൻഷനിൽ കേരള ഗവർണർ രാജേന്ദ്ര വിശ്വനാഥ് അർലേക്കർ പങ്കെടുക്കും.
ഫൊക്കാന പ്രസിഡന്റ് സജിമോൻ ആന്റണിയുടെ ക്ഷണം സ്വീകരിച്ചാണ് ഓഗസ്റ്റ് ആറ് മുതൽ ഒമ്പത് വരെ പെൻസിൽവേനിയയിലെ പോക്കനോസ് മൗണ്ടൻസിലെ കൽഹാരി റിസോർട്ടിൽ നടക്കുന്ന കൺവൻഷനിൽ പങ്കെടുക്കാമെന്ന് രാജേന്ദ്ര അർലേക്കർ അറിയിച്ചത്.
സജിമോൻ ആന്റണിയോടൊപ്പം മുൻ പ്രസിഡന്റ് മാധവൻ ബി. നായരും കേരള കോഓർഡിനേറ്റർ സുനിൽ പാറയ്ക്കലും ഗവർണറെ ക്ഷണിക്കാൻ രാജ്ഭവനിൽ എത്തിയിരുന്നു.

ഫൊക്കാനയുടെ മെഡിക്കൽ കാർഡ്, പ്രിവിലേജ് കാർഡ്, ഹെൽത്ത് ക്ലിനിക്, സിം കേരള സിം, ലഹരിക്കെതിരായ പോരാട്ടം, ഹൗസിംഗ് പ്രൊജക്ട് തുടങ്ങിയ പദ്ധതികളെ പറ്റി ഇവർ ഗവർണറുമായി സംസാരിക്കുകയും ഗവർണർ ഫൊക്കാനയുടെ പ്രവർത്തനങ്ങളെ പ്രശംസിക്കുകയും ചെയ്തു.
മുഖ്യമന്ത്രി പിണറായി വിജയനെയും കൺവൻഷനിൽ പങ്കെടുപ്പിക്കാന് ശ്രമിക്കുന്നുണ്ട്. കേരളത്തിലെയും ഇന്ത്യയിലെയും അമേരിക്കയിലെയും രാഷ്ട്രീയ - സാമൂഹിക - സാംസ്കാരിക രംഗത്തെ പ്രമുഖരും കണ്വെന്ഷനില് പങ്കെടുക്കും.
വിവിധ രാജ്യങ്ങളില് നിന്നായും 106 അംഗ സംഘടനകളില് നിന്നുമുള്ള പ്രതിനിധികള് ഉൾപ്പെടെ അയായിരത്തോളം ആളുകളെയാണ് കണ്വന്ഷനില് പ്രീതീക്ഷിക്കുന്നത്. നിരവധി പരിപാടികൾ കൺവൻഷന്റെ ഭാഗമായി അരങ്ങേറും.
Tags : Kerala Governor Rajendra Arlekar Fokana Convention USA