എഡ്മന്റൺ: കാനഡയിലെ ആൽബെർട്ട പ്രവിശ്യയിലെ എഡ്മന്റൺ ആസ്ഥാനമാക്കി പ്രവർത്തിക്കുന്ന പ്രമുഖ മലയാളി കൂട്ടായ്മയായ "പെരിയാർതീരം അസോസിയേഷൻ' തങ്ങളുടെ പ്രവർത്തനപഥത്തിലെ പത്താം വാർഷികം ആവേശകരമായ പരിപാടികളോടെ ആഘോഷിച്ചു.
അങ്കമാലി, മലയാറ്റൂർനീലേശ്വരം, മഞ്ഞപ്ര, കാലടി, കാഞ്ഞൂർ, നെടുമ്പാശേരി, അയ്യമ്പുഴ, കറുകുറ്റി, മൂക്കന്നൂർ, തുറവൂർ, പാറക്കടവ്, ശ്രീമൂലനഗരം, ചെങ്ങമനാട് തുടങ്ങി പെരിയാറിന്റെ തീരപ്രദേശങ്ങളിലെ വിവിധ പഞ്ചായത്തുകളിൽ നിന്നും മുനിസിപ്പാലിറ്റികളിൽ നിന്നും എഡ്മന്റണിൽ കുടിയേറിയ കുടുംബങ്ങളുടെ ഈ കൂട്ടായ്മ പ്രവാസലോകത്ത് കേരളീയ തനിമയുടെയും സാഹോദര്യത്തിന്റെയും പ്രതീകമായി മാറിയിരിക്കുകയാണ്.

സാംസ്കാരികം, വിദ്യാഭ്യാസം, ജീവകാരുണ്യം, കായികം തുടങ്ങിയ മേഖലകളിൽ സജീവമായ അസോസിയേഷൻ, കേരളീയ പൈതൃകം പുതുതലമുറയ്ക്ക് കൈമാറുന്നതിലും നാട്ടിലെ നിർധനരായവർക്ക് വർഷാവർഷം ചികിത്സാ സഹായം എത്തിക്കുന്നതിലും മാതൃകാപരമായ പ്രവർത്തനങ്ങളാണ് കാഴ്ചവെക്കുന്നത്.
എഡ്മന്റണിലെ ബാൽവിൻ കമ്മ്യൂണിറ്റി ഹാളിൽ നടന്ന ആഘോഷ പരിപാടികൾ പ്രമുഖ മലയാള ചലച്ചിത്ര താരം, നിർമാതാവ്, സവോയ്സ് ഗ്രൂപ്പ് ഓഫ് കമ്പനീസ് ഉടമയുമായ സജയ് സെബാസ്റ്റ്യൻ ഉദ്ഘാടനം ചെയ്തു.

കോസ്മോ ഓട്ടോ സർവീസസിലെ ജോമി ജോർജ് വാർഷിക ഡയറക്ടറി പ്രകാശനം ചെയ്തു. പുതുതായി നിർമ്മിച്ച വീടിന്റെ ഡിജിറ്റൽ കീ കൈമാറലും അതിന്റെ നാല് മാസത്തെ നിർമ്മാണ പുരോഗതി വിവരിക്കുന്ന അവതരണവും സുനിൽ പൗലോസ് നിർവഹിച്ചു.

ചടങ്ങിൽ ഇന്ത്യയിലെ ഏറ്റവും വലിയ സോഷ്യൽ വർക്ക് സംഘടനയുടെ പുരസ്കാരം ലഭിച്ച ഡോ. പി.വി. ബൈജുവിനെ അസോസിയേഷൻ ആദരിച്ചു. ജനറൽ കൺവീനർ സുനിൽ തെക്കേക്കര സ്വാഗതവും പ്രസിഡന്റ് ജോസ് തോമസ് അധ്യക്ഷ പ്രസംഗവും നടത്തി.

പ്രോഗ്രാം കോഓർഡിനേറ്റർ വിൻസൺ കോണുകുടി നന്ദി രേഖപ്പെടുത്തി. പത്താം വാർഷികത്തിന്റെ തിളക്കമാർന്ന സ്മരണയ്ക്കായി മലയാറ്റൂർനീലേശ്വരം പഞ്ചായത്തിലെ രണ്ടാം വാർഡിലെ ഒരു നിർദ്ധന കുടുംബത്തിന് പെരിയാർതീരം നിർമിച്ചു നൽകിയ സ്നേഹവീട് അസോസിയേഷന്റെ കാരുണ്യപ്രവർത്തനങ്ങളിലെ നാഴികക്കല്ലായി മാറി.
Tags : periyar theeram association annuval celebration canada