കല്പ്പറ്റ: വയനാട്ടില് സിപിഎമ്മിലും കോണ്ഗ്രസിലുമുള്ള ജനറല് വിഭാഗം നേതാക്കളില് മനം മടുപ്പ്. നിയമസഭയിലോ ലോക്സഭയിലോ എത്തിപ്പെടാന് "അവസരം’ ഇല്ലാത്തത് ഇവരില് രാഷ്ട്രീയ പ്രവര്ത്തനോര്ജം കുറയ്ക്കുകയാണ്.
മൂന്ന് നിയമസഭാ മണ്ഡലങ്ങളാണ് ജില്ലയില്. ഇതില് മാനന്തവാടിയും ബത്തേരിയിലും പട്ടികവര്ഗത്തിന് സംവരണം ചെയ്തതാണ്. കല്പ്പറ്റയാണ് ഏക ജനറല് മണ്ഡലം. ജില്ലയിലെ നിയമസഭാമണ്ഡലങ്ങളും ഉള്പ്പെടുന്നതാണ് വയനാട് പാര്ലമെന്റ് മണ്ഡലം. ജില്ലയില് യോഗ്യതയുള്ളവര് ഉണ്ടായിട്ടും വയനാട് പാര്ലമെന്റ് മണ്ഡലത്തില് ജനവിധി തേടാന് പുറംനാട്ടുകാര്ക്കാണ് അവസരം ലഭിച്ചത്. രൂപീകരണത്തിനു പിന്നാലെ നടന്ന തെരഞ്ഞെടുപ്പില് എം.ഐ. ഷാനവാസിനാണ് മണ്ഡലത്തില് മത്സരിക്കാന് നറുക്കുവീണത്. പിന്നീട് നടന്ന തെരഞ്ഞെടുപ്പുകളില് പാര്ട്ടി ദേശീയ നേതാക്കളായ രാഹുല്ഗാന്ധിയും പ്രിയങ്കഗാന്ധിയും സീറ്റ് കൊണ്ടുപോയി.
ഇടതു മുന്നണി സിപിഐയ്ക്ക് നല്കിയതാണ് വയനാട് പാര്ലമെന്റ് സീറ്റ്. സിപിഐയിലെ സത്യന് മൊകേരി, പി.പി. സുനീര്, ആനി രാജ എന്നിവരാണ് മണ്ഡലത്തില് പയറ്റിത്തോറ്റത്. സിപിഐ സ്ഥാനാര്ഥികള്ക്ക് വോട്ടുറപ്പിക്കുന്ന ജോലിയാണ് വയനാട് മണ്ഡലത്തില് കഴിഞ്ഞ തെരഞ്ഞെടുപ്പുകളില് സിപിഎം നേതാക്കള്ക്കു ചെയ്യാനുണ്ടായിരുന്നത്. മണ്ഡലത്തില് മത്സരിക്കാന് അവസരം സമീപകാലത്തൊന്നും ലഭിക്കുമെന്ന പ്രതീക്ഷ സിപിഎം നേതാക്കള്ക്കില്ല.
കല്പ്പറ്റ നിയമസഭാ മണ്ഡലത്തിലും ജനവിധി തേടാന് യോഗമില്ലാത്ത സ്ഥിതിയിലാണ് ജില്ലയിലെ സിപിഎം, കോണ്ഗ്രസ് നേതാക്കള്. കല്പ്പറ്റയില് ജില്ലയിലെ കോണ്ഗ്രസ് നേതാക്കള് ടിക്കറ്റ് കാത്തിരിക്കുന്നതിനിടെയാണ് കഴിഞ്ഞ തെരഞ്ഞെടുപ്പില് കോഴിക്കോടുനിന്ന് ടി. സിദ്ദിഖ് സ്ഥാനാര്ഥിയായി എത്തിയത്. വരുന്ന തെരഞ്ഞെടുപ്പിലും അദ്ദേഹം തന്നെയായിരിക്കും മണ്ഡലത്തില് യുഡിഎഫ് സ്ഥാനാര്ഥി.
കോണ്ഗ്രസ്, സിപിഎം സംസ്ഥാന നേതൃത്വം ജില്ലയില്നിന്നുള്ളവര്ക്ക് മറ്റിടങ്ങളില് മത്സരിച്ച് നിയമസഭയിലോ ലോക്സഭയിലോ എത്താനും വഴിയൊരുക്കുന്നില്ല. എന്നാല് മുസ്ലിംലീഗ് ജില്ലയിലെ നേതാക്കളെ ഇതര ജില്ലകളിലെ മണ്ഡലങ്ങളില് മത്സരപ്പിച്ച് നിയമസഭയിലെത്തിച്ചിട്ടുണ്ട്. ജില്ലയില്നിന്നുള്ള സി. മമ്മൂട്ടിയെ കൊടുവള്ളിയില്നിന്നും തിരൂരില്നിന്നും ലീഗ് നിയമസഭയിലെത്തിച്ചു.
കെ.എം. ഷാജിക്ക് ഇരവിപുരത്തും പിന്നീട് അഴീക്കോടിലും സീറ്റ് നല്കി. ഇരവിപുരത്ത് വീണ ഷാജി അഴിക്കോടില് ജയിച്ചുകയറി. രാജ്യസഭാ സീറ്റുകളിലും ജില്ലയില്നിന്നുള്ള കോണ്ഗ്രസ്, സിപിഎം നേതാക്കള്ക്ക് പരിഗണന ലഭിക്കാത്ത സ്ഥിതിയാണ്.
Tags : Wayanad MP MLA CPM Congress