കൂളിംഗ് നഷ്ടപ്പെട്ടതിന്റെ വിഷമം രസകരമായ കുറിപ്പിലൂടെ പങ്കുവച്ച് നവ്യ നായർ. പുഴയിൽ മുഖം കഴുകാനായി ഇറങ്ങിയപ്പോഴാണ് താരത്തിന്റെ കണ്ണട നഷ്ടമായത്. ഇതിനെ ദൃശ്യത്തിലെ വരുണിനോടാണ് നടി ഉപമിച്ചത്. വരുണിന്റെ ബോഡി കിട്ടിയാലും ഗ്ലാസ് കിട്ടില്ല എന്നുറപ്പായപ്പോൾ അന്വേഷണം നിർത്തിയെന്നാണ് നവ്യ തമാശരൂപേണ പറഞ്ഞത്.
നവ്യയുടെ കുറിപ്പിന്റെ പൂർണരൂപം
ആർഐപി കണ്ണാടി(ഗോഗിൾസ്). കണ്ണാടി കാണാതെ പോകുന്നതിന് ഏതാനും നിമിഷങ്ങൾക്ക് മുൻപു ഞാൻ എടുത്ത ചിത്രങ്ങൾ. ഇനി ഇത് ഓർമകളിൽ മാത്രം. ചായ കുടിക്കുന്ന രണ്ടാമത്തെ ചിത്രത്തിൽ ഗോഗിൾസ് (കണ്ണട) എന്റെ പോക്കറ്റിൽ ഇരിക്കുന്നത് പ്രത്യേകം ശ്രദ്ധിക്കണം നിങ്ങൾ.
ഇത് പൊതുവെ ഞാൻ ഷർട്ടിന്റെ മുൻ ഭാഗത്താണ് വയ്ക്കുന്നത്. എല്ലാവരെയും പോലെ, പക്ഷേ പാന്റ്സിന്റെ സിബ്ബിൽ വയ്ക്കുന്ന, അപ്പോ കിട്ടിയ ഐഡിയ മഹത്തരമാണ് എന്ന ചിന്തയിൽ, എന്റെ ബുദ്ധിയെ ഞാൻ തന്നെ പ്രശംസിച്ചുകൊണ്ട് നിൽക്കുകയായിരുന്നു.
വീഡിയോയിൽ കാണുന്ന ഫോക്കസ് ഷിഫ്റ്റ് വേഷം കെട്ടലും കഴിഞ്ഞാണ് പുഴയിൽ മുഖം കഴുകാൻ പോയത് (ആ വീഡിയോയിൽ ഗോഗിൾസ് ഇല്ല. സോ അതിനു മുൻപ് സംഭവം നഷ്ടപ്പെട്ടിരിക്കുന്നു) അതോടെ ഫോണിന്റെ ബാക് സൈഡും പൊട്ടി, ഗോഗിൾസും പോയി. വരുണിന്റെ (ദൃശ്യം) ബോഡി കിട്ടിയാലും എന്റെ ഗോഗിൾസ് കിട്ടില്ല എന്നുറപ്പായപ്പോൾ തപ്പൽ നിർത്തി.
അപ്പോഴാണ് ലക്ഷ്മീടെ കാൾ, കാലത്ത് വള്ളി പിടിക്കുന്നതിനെപ്പറ്റിയുള്ള ഒരു പോസ്റ്റ് ഇട്ടിരുന്നു, അത് മറ്റൊരു വള്ളി ആയി എന്നും പറഞ്ഞ്... വല്ലപ്പോഴുമാണ് ഇൻസ്റ്റയിൽ കേറുന്നതെങ്കിലും ഓരോന്ന് ഒപ്പിക്കാൻ കഴിയുന്ന ആ മനസുണ്ടല്ലോ, പറയുന്നതിൽ ചില സത്യങ്ങൾ പായസത്തിലെ മുന്തിരിപോലെ മൊഴച്ചുനിൽക്കുന്നതുകൊണ്ട്, നിശബ്ദയായിരുന്നു. ഇപ്പോ ഒരു സുഖം തോന്നുന്നുണ്ട്. ഇന്നത്തെ വള്ളിക്കഥകൾ ഇവിടെ അവസാനിക്കുന്നു. ആരെ ആണാവോ കണികണ്ടത്.
Tags : Navya Nair Movie News Malayalam Cinema