പാറ്റ്ന: ബിഹാർ നിയമസഭാ തെരഞ്ഞെടുപ്പിന്റെ ഫലം പൂർത്തിയാകാൻ മണിക്കൂറുകൾ ബാക്കി നിൽക്കെ മധുരപലഹാരങ്ങൾ തയ്യാറാക്കി എൻഡിഎ സഖ്യം. വോട്ടെണ്ണലുകൾ പുരോഗമിക്കുമ്പോൾ മൊകാമയിൽ നിന്നും ജെഡിയുവിന്റെ സ്ഥാനാർഥിയായി മത്സരിക്കുന്ന അനന്ത് സിംഗിന്റെ പാറ്റ്നയിലെ വീട്ടിൽ ലഡ്ഡുവും രസഗുളകളും തയ്യാറായി കഴിഞ്ഞിരിക്കുകയാണ്.
അനന്ത് സിംഗിന്റെ വീട്ടിൽ 10,000 ലിറ്റർ പാലാണ് എത്തിച്ചിരിക്കുന്നത്. രണ്ടുലക്ഷം ഗുലാബ് ജാമുനുകളും അഞ്ചുലക്ഷത്തിലധികം രസഗുളകളും തയ്യാറാകുന്നുവെന്നാണ് റിപ്പോർട്ട്. അൻപതിനായിരം പേർക്ക് വിരുന്ന് നൽകുന്നതിനുള്ള ഒരുക്കമാണ് അനന്ത് സിംഗിന്റെ വീട്ടിൽ നടക്കുന്നത്.
ബിജെപി സംസ്ഥാന എക്സിക്യൂട്ടീവ് കമ്മിറ്റി അംഗം കൃഷ്ണ സിംഗ് കല്ലു 500 കിലോഗ്രാം ലഡുവിന് ഓർഡർ നൽകിയിട്ടുണ്ട്. നരേന്ദ്ര മോദിയുടെയും നിതീഷ് കുമാറിന്റെയും വലിയ ചിത്രങ്ങൾ മുന്നിൽ വച്ചാണ് ലഡു തയ്യാറാക്കുന്നത്.
നാൽപ്പത്തിയെട്ട് മിഠായി നിർമാതാക്കൾ പലതരം മധുരപലഹാരങ്ങൾ ഉണ്ടാക്കുന്ന തിരക്കിലാണ്. വലിയ വിരുന്നിനുള്ള ഒരുക്കമാണ് നടക്കുന്നതെന്നാണ് സൂചനകൾ.
Tags : BIHAR ELECTION NDA BJP JDU