ടെക്സസ്: ഫൊക്കാന ടെക്സസ് റീജണൽ വൈസ് പ്രസിഡന്റ് സ്ഥാനത്തേക്ക് വിനോയ് കുര്യൻ മത്സരിക്കുന്നു. ലീല മാരേട്ട് നയിക്കുന്ന പാനലിന് കീഴിലാണ് വിനോയ് കുര്യൻ മത്സരിക്കുന്നത്.
കേരളത്തിന്റെയും അമേരിക്കയുടെയും സാമൂഹിക - സാംസ്കാരിക മണ്ഡലങ്ങളിൽ ദീർഘകാല പ്രവർത്തനപരിചയമുള്ള വ്യക്തിത്വമാണ് വിനോയ്. കോട്ടയം ഏറ്റുമാനൂർ സ്വദേശിയായ വിനോയ് മഹാരാഷ്ട്രയിൽ നിന്നും കംപ്യൂട്ടർ സയൻസിൽ മാസ്റ്റേഴ്സ് ഡിഗ്രി നേടിയ ശേഷമാണ് കരിയർ ആരംഭിച്ചത്.
അമേരിക്കയിലെത്തിയ ശേഷവും മലയാളി സംഘടനകളുമായി കൈകോർത്ത് സജീവ സാന്നിധ്യമായി. മൂന്നു ദശാബ്ദം നീളുന്ന ഐടി രംഗത്തെ അനുഭവസമ്പത്തും അമേരിക്കയിലെ നിരവധിയായ മൾട്ടിനാഷനൽ കമ്പനികളിൽ പ്രവർത്തിച്ചിട്ടുള്ള പ്രവർത്തിപരിചയവും നേതൃക്ഷമതയും സാങ്കേതിക പരിജ്ഞാനവും അദ്ദേഹത്തിന്റം സ്വീകാര്യത വർധിപ്പിക്കുന്ന ഘടകങ്ങളാണ്.
ഹൂസ്റ്റൺ സെന്റ് ജോസഫ് സീറോമലബാർ പള്ളി അംഗമാണ്. നാല് വികാരിമാരുടെ കാലഘട്ടത്തിൽ പള്ളിക്കമ്മിറ്റി അംഗം, രണ്ടു തവണ പള്ളി കൗൺസിൽ സെക്രട്ടറി, ഓക്ലഹോമയിൽ നടന്ന ആദ്യ ഇന്റർ പാരിഷ് സ്പോർട്സ് ഫെസ്റ്റിവലിന്റെ ഹൂസ്റ്റൺ കോഓർഡിനേറ്റർ എന്നീ നിലകളിൽ പ്രവർത്തിച്ചിട്ടുണ്ട്.
പള്ളിയുടെ ഇരുപതാം വാർഷികാഘോഷമായ "20/20 പ്രോജക്ട്' വിജയകരമായി നടത്തിയും അദ്ദേഹത്തിന്റെ നേതൃത്വത്തിൽ കേരളത്തിൽ 20 കുടുംബങ്ങൾക്ക് വീട് നിർമിച്ച് നൽകി. ഹൂസ്റ്റണിലെ മലയാളി സംഘടനകളിൽ കരുത്തുറ്റ സാന്നിധ്യമാണ് വിനോയ്.
മാഗിൽ ലൈഫ് ടൈം അംഗവും ഒരുമയിലെ സജീവപ്രവർത്തകനുമാണ്. 2017 - 2019ൽ പ്രസിഡന്റും സെക്രട്ടറിയുമായി പ്രവർത്തിച്ചു. കേരള പ്രളയബാധിതർക്കായി ഗോഫണ്ട് മുഖേന ഫണ്ട് ശേഖരിച്ച് അഞ്ച് കുടുംബങ്ങൾക്ക് വ്യക്തിപരമായി സഹായം കൈമാറി.
ഹാർവേ ചുഴലിക്കാറ്റ് ദുരിതബാധിതർക്ക് സഹായങ്ങൾ നൽകാനും അദ്ദേഹം നേതൃത്വം നൽകി.
Tags : Vinoy Kurian Fokana Election USA