കോഴിക്കോട്: ഏതാനും ദിവസത്തേക്ക് കോഴിക്കോട് നഗരം സെലിബ്രിറ്റി ഡെസ്റ്റിനേഷൻ ആകുന്നു. സുനിത വില്യംസ്, ബെൻ ജോൺസൺ അടക്കമുള്ള പ്രമുഖർ ഈ ദിവസങ്ങളിൽ നഗരത്തിലേക്ക് എത്തും. 22 മുതൽ 25 വരെ കോഴിക്കോട്ട് ഡിസിബുക്സ് സംഘടിപ്പിക്കുന്ന കേരള ലിറ്ററേച്ചർ ഫെസ്റ്റിവലുമായി ബന്ധപ്പെട്ടാണ് അന്താരാഷ്‌ട്ര തലത്തിൽ പ്രശസ്തരായവർ അടക്കം ഇവിടേക്ക് എത്തുന്നത്.
വിവിധ ദിവസങ്ങളിൽ ബഹിരാകാശ ശാസ്ത്രജ്ഞ സുനിത വില്യംസ്, ട്രാക്കിലെ മിന്നൽപ്പിണർ ഒളിമ്പിക് സ്വർണമെഡൽ ജേതാവ് ബെൻ ജോൺസൺ, വിക്കിപീഡിയ സ്ഥാപകൻ ജിമ്മി വെയിൽസ്, ബുക്കർ പ്രൈസ് ജേതാവ് കിരൺ ദേശായി, ലോകപ്രശസ്ത ചരിത്രകാരി റോമില താപർ, പ്രശസ്ത ജർമൻ എഴുത്തുകാരനായ ഇംഗോ ഷുൾസെ, എഴുത്തുകാരൻ സറ്റോഷി യാഗിസാവ എന്നിവർ കോഴിക്കോട്ടേക്ക് എത്തും.
പ്രശസ്ത സ്പാനിഷ് എഴുത്തുകാരായ ഇഗ്നാസിയോ ഗാർസിയ, ഗബ്രിയേല ഇബാറ, ജീസസ് റൂയിസ് മന്റ്റില എന്നിവരും അതിഥികളായെത്തും. രചയിതാവും പണ്ഡിതനുമായ അബ്ദുൾ റസാഖ് ഗുർണ, ഒാസീസ് എഴുത്തുകാരൻ ഒമർ മൂസ എന്നിവരും പ്രധാന ആകർഷണമാണ്.
മുഖ്യമന്ത്രി പിണറായി വിജയൻ, പ്രതിപക്ഷനേതാവ് വി.ഡി സതീഷൻ, എഴുത്തുകാരിൽ പ്രമുഖരായ എം. മുകുന്ദൻ, കെ.ആർ. മീര, ബെന്യാമിൻ, അഖിൽ പി. ധർമജൻ, ജോസഫ് അന്നംകുട്ടി ജോസ്, പിക്കോ അയ്യർ തുടങ്ങിയവരും സിനിമ മേഖലയിൽനിന്ന് പ്രകാശ് രാജ്, സുരഭി ലക്ഷ്മി, ജോയ് മാത്യു, ഗൗതം വാസുദേവ് മേനോൻ, റിമ കല്ലിങ്കൽ, പ്രകാശ് വർമ, നാസർ, ഗാനരചയിതാവായ കൈതപ്രം ദാമോദരൻ നമ്പൂതിരി, സന്തോഷ് ജോർജ് കുളങ്ങര തുടങ്ങി നിരവധി പ്രമുഖരും എത്തിചേരും.

Tags : Sunita Williams Ben Johnson KLF kerala litarature festival kozhikode celebrity writers