ലോകത്തെയാകെ അമ്പരപ്പിച്ചുകൊണ്ട് സാങ്കേതികവിദ്യയുടെ പുതിയൊരു അധ്യായം ചൈനയിൽ തുറക്കപ്പെട്ടിരിക്കുകയാണ്. അടുത്തിടെ സോഷ്യൽ മീഡിയയിൽ വൈറലായ ഒരു വീഡിയോയിലൂടെ ചൈനീസ് ഹ്യൂമനോയിഡ് റോബോർട്ടുകൾ അവയുടെ നൃത്തവൈഭവം കൊണ്ട് ലോകത്തെ അമ്പരപ്പിച്ചിരിക്കുകയാണ്.
ലോകപ്രശസ്ത ചൈനീസ്-അമേരിക്കൻ ഗായകനായ വാങ് ലീഹോമിന്റെ ചെങ്ഡുവിൽ നടന്ന സംഗീത പരിപാടിയിലായിരുന്നു ഈ വിസ്മയ കാഴ്ച അരങ്ങേറിയത്.
സാധാരണയായി വലിയ യന്ത്രങ്ങൾ സ്റ്റേജിൽ അനങ്ങാതെ നിൽക്കുന്ന കാഴ്ചയിൽ നിന്ന് വ്യത്യസ്തമായി, മനുഷ്യ നർത്തകർക്കൊപ്പം ഒട്ടും പിന്നിലാകാതെ അതിവേഗത്തിലുള്ള ചുവടുകൾ വെക്കുന്ന യൂണിട്രീ ജി1 റോബോർട്ടുകളെയാണ് ലോകം കണ്ടത്.
ഹിപ്-ഹോപ്പ് വസ്ത്രങ്ങൾ ധരിച്ചെത്തിയ ഈ കുട്ടി റോബോർട്ടുകൾ പ്രൊഫഷണൽ നർത്തകർക്ക് സമാനമായ മെയ്വഴക്കത്തോടെയാണ് സ്റ്റേജിൽ നിറഞ്ഞാടിയത്.
റോബോർട്ടുകളുടെ വെബ്സ്റ്റർ ഫ്ലിപ്പുകൾ ഉൾപ്പെടെയുള്ള അഭ്യാസങ്ങൾ ടെസ്ല മേധാവി ഇലോൺ മസ്കിന്റെ പോലും ശ്രദ്ധ പിടിച്ചുപറ്റി. വീഡിയോ റീ-ഷെയർ ചെയ്തുകൊണ്ട് ഇത് അതീവ ശ്രദ്ധേയമായ ഒന്നാണെന്ന് അദ്ദേഹം കുറിച്ചു.
ഈ വീഡിയോ കോടിക്കണക്കിന് ആളുകളാണ് കണ്ടത്. എൻജിനീയറിങ് മികവും കലയും ഒരുപോലെ ഒത്തുചേരുന്ന കാഴ്ചയാണിതെന്ന് പലരും അഭിപ്രായപ്പെട്ടു.
മനുഷ്യരുടെ സഹായമില്ലാതെ തന്നെ ഇത്തരം സങ്കീർണമായ ചലനങ്ങൾ റോബോർട്ടുകൾ ചെയ്യുന്നത് കാണുമ്പോൾ ചിലരിൽ അത് അത്ഭുതത്തോടൊപ്പം ആശങ്കയും ഉളവാക്കുന്നുണ്ട്.
ഭാവിയിൽ മനുഷ്യരുടെ ജോലി സാധ്യതകളെ ഇവ ബാധിക്കുമോ എന്ന പേടിയാണ് ചിലർ പങ്കുവെച്ചത്. എങ്കിലും സാങ്കേതിക മേഖലയിലെ ഈ കുതിച്ചുചാട്ടം വലിയ മാറ്റങ്ങൾക്ക് വഴിതുറക്കുമെന്ന കാര്യത്തിൽ തർക്കമില്ല.
ട്രാഫിക് നിയന്ത്രണം പോലുള്ള ദൈനംദിന കാര്യങ്ങളിൽ ഇത്തരം യന്ത്രമനുഷ്യരുടെ സേവനം ഉപയോഗപ്പെടുത്താൻ കഴിയുമോ എന്ന ഗൗരവകരമായ ചർച്ചകളും ഈ വീഡിയോക്ക് പിന്നാലെ സോഷ്യൽ മീഡിയയിൽ ഉയരുന്നുണ്ട്.
Tags : ViralNews FutureIsHere ChinaTech TechInnovation TrendingNow