ഓടിക്കൊണ്ടിരിക്കുന്ന ട്രെയിനിലെ യാത്രക്കാർക്ക് നേരെ റെയിൽവേ ട്രാക്കിൽ നിന്നുകൊണ്ട് ഒരാൾ ഹോസ് ഉപയോഗിച്ച് വെള്ളം ചീറ്റുന്ന ദൃശ്യങ്ങൾ സമൂഹമാധ്യമങ്ങളിൽ വലിയ രീതിയിലുള്ള രോഷത്തിന് കാരണമായിരിക്കുകയാണ്.
ഇന്സ്റ്റാഗ്രാമിൽ പ്രചരിക്കുന്ന ഈ വീഡിയോയിൽ, തോളിൽ ഒരു ബാഗ് തൂക്കിയ യുവാവ് ട്രാക്കുകൾക്കിടയിലുള്ള പൈപ്പിൽ നിന്നും വെള്ളം ചീറ്റുന്നതാണ് കാണുന്നത്.
ട്രെയിനിന്റെ വാതിൽക്കൽ നിൽക്കുന്ന യാത്രക്കാരെ കൃത്യമായി ലക്ഷ്യം വെച്ചാണ് ഇയാൾ ഈ അതിക്രമം കാണിക്കുന്നത്. ട്രെയിനിന്റെ വേഗതയും വെള്ളത്തിന്റെ ശക്തിയും കാരണം സെക്കന്റുകൾക്കുള്ളിൽ യാത്രക്കാർ പൂർണമായും നനഞ്ഞു കുതിരുന്നത് ദൃശ്യങ്ങളിൽ വ്യക്തമാണ്.
ഈ സംഭവം എവിടെയാണ് നടന്നതെന്നോ ഇതിന് പിന്നിലുള്ള വ്യക്തി ആരാണെന്നോ ഉള്ള ഔദ്യോഗിക വിവരങ്ങൾ ഇതുവരെ ലഭ്യമായിട്ടില്ലെങ്കിലും റെയിൽവേ സുരക്ഷാ സേനയുടെ വീഴ്ചയെക്കുറിച്ച് വലിയ വിമർശനങ്ങൾ ഉയരുന്നുണ്ട്.
സോഷ്യൽ മീഡിയയിൽ ഈ ദൃശ്യങ്ങൾ പ്രത്യക്ഷപ്പെട്ടതോടെ നിരവധി ആളുകളാണ് തങ്ങളുടെ പ്രതിഷേധം രേഖപ്പെടുത്തിയത്. മറ്റുള്ളവരെ ഉപദ്രവിക്കുന്നതിലൂടെ എന്ത് സന്തോഷമാണ് ഇത്തരക്കാർക്ക് ലഭിക്കുന്നതെന്നും നിയമത്തോടുള്ള ഭയമില്ലായ്മയാണ് ഇത്തരം പ്രവർത്തികൾക്ക് കാരണമെന്നും പലരും അഭിപ്രായപ്പെട്ടു.
യാത്രക്കാരുടെ സുരക്ഷയെപ്പോലും പരിഗണിക്കാതെ വെള്ളം പാഴാക്കിക്കൊണ്ടുള്ള ഈ പ്രവൃത്തിക്കെതിരെ കർശന നടപടി വേണമെന്നാണ് ഭൂരിഭാഗം ആളുകളുടെയും ആവശ്യം.
ചിലർ ഇതിനെ പരിഹാസരൂപേണ വിമർശിക്കുമ്പോൾ മറ്റു ചിലർ ഈ ക്രൂരതയ്ക്ക് പിന്നിലെ മാനസികാവസ്ഥയെയാണ് ചോദ്യം ചെയ്യുന്നത്.
Tags : ViralVideo TrendingNews InternetOutrage ShockingCCTV SocialMediaViral