കാസര്ഗോഡ്: തദ്ദേശ തെരഞ്ഞെടുപ്പില് യുഡിഎഫിന്റെ മികച്ച മുന്നേറ്റം തിരിച്ചടിയായെങ്കിലും വലിയ പരിക്കുകളില്ലാതെ പിടിച്ചുനിന്ന് എല്ഡിഎഫ്. വാര്ഡ് പുനര്വിഭജനമാണ് എല്ഡിഎഫിന് പലയിടത്തും രക്ഷയായതെന്ന് തെരഞ്ഞെടുപ്പ് ഫലങ്ങള് സൂചിപ്പിക്കുന്നു. ജില്ലാ പഞ്ചായത്തില് ഒരു സീറ്റ് ലീഡില് എല്ഡിഎഫിന്റെ ഭരണത്തുടര്ച്ചയുണ്ടാകുമെന്നുറപ്പായി.
ചെങ്കള ഡിവിഷന് എല്ഡിഎഫില് നിന്നും യുഡിഎഫ് പിടിച്ചെടുത്തപ്പോള് ദേലംപാടി ഡിവിഷന് യുഡിഎഫില് നിന്നും എല്ഡിഎഫും പിടിച്ചെടുത്തു. ഇടത് അനുകൂല ബ്ലോക്ക് ഡിവിഷനുകളെല്ലാം ചേര്ത്ത് രൂപീകരിച്ച ബേക്കല് ഡിവിഷനില് മുസ്ലിം ലീഗിനോട് വിയര്ത്തുനേടിയ വിജയമാണ് എല്ഡിഎഫിന് തുണയായത്. കള്ളാര് ഉള്പ്പെടെ പലയിടത്തും എല്ഡിഎഫിന്റെ ഭൂരിപക്ഷം ഗണ്യമായി കുറയ്ക്കാന് യുഡിഎഫിന് കഴിഞ്ഞു. അതേസമയം ബിജെപിക്ക് സിറ്റിംഗ് സീറ്റായ പുത്തിഗെ ഡിവിഷന് നഷ്ടമായി.
ജില്ലയിലെ ഏറ്റവും വലിയ മുനിസിപ്പാലിറ്റിയായ കാഞ്ഞങ്ങാട് ഭരണം നിലനിര്ത്തിയെങ്കിലും കേവലഭൂരിപക്ഷം നേടാന് എല്ഡിഎഫിന് കഴിഞ്ഞില്ല. നീലേശ്വരത്ത് ഭരണം നിലനിര്ത്താന് കഴിഞ്ഞെങ്കിലും ചില സിറ്റിംഗ് സീറ്റുകള് നഷ്ടപ്പെട്ടു. കാസര്ഗോഡ് മുനിസിപ്പാലിറ്റിയില് ആധികാരിക വിജയം നേടാന് യുഡിഎഫിനായി. ഇവിടെയും ബിജെപിക്ക് പ്രതീക്ഷിച്ച നേട്ടമുണ്ടാക്കാനായില്ല. ബ്ലോക്ക് പഞ്ചായത്തുകളില് കാഞ്ഞങ്ങാട്ട് എല്ഡിഎഫിന് വലിയ തിരിച്ചടിയുണ്ടായി. കഴിഞ്ഞവട്ടം മൂന്നു സീറ്റ് മാത്രമുണ്ടായിരുന്ന യുഡിഎഫ് ഏഴായി വര്ധിപ്പിച്ചു. ഒരു സീറ്റിന്റെ വ്യത്യാസത്തിലാണ് എല്ഡിഎഫ് ഇവിടെ ഭരിക്കുന്നത്.
ഗ്രാമപഞ്ചായത്തുകളില് വെസ്റ്റ് എളേരി, പടന്ന പഞ്ചായത്തുകള് തിരിച്ചുപിടിക്കാനായതാണ് എല്ഡിഎഫിന്റെ എടുത്തുപറയാനുള്ള നേട്ടം. എട്ടു പഞ്ചായത്തുകളില് എല്ഡിഎഫിന് ഭരണം നഷ്ടമായി. പതിവായി മുഴുവന് സീറ്റുകളും ജയിക്കുന്ന സിപിഎമ്മിന്റെ ഉരുക്കുകോട്ടകളായ ബേഡഡുക്കയില് രണ്ടു സീറ്റിലും കയ്യൂര്- ചീമേനിയില് ഒരു സീറ്റിലും അവര് കോണ്ഗ്രസിനോട് തോറ്റു.
Tags : LDF Kasaragod UDF NDA Kerala local body election