ലണ്ടൻ: ഇംഗ്ലീഷ് പ്രീമിയർ ലീഗിൽ ഒന്നാം സ്ഥാനക്കാരായ ആഴ്സണലിനെ സമനിലയിൽ തളച്ച് നോട്ടിംഗ്ഹാം ഫോറസ്റ്റ്. നോട്ടിംഗ്ഹാം ഫോറസ്റ്റിന്റെ തട്ടകത്തിൽ നടന്ന മത്സരത്തിൽ ഗോൾരഹിത സമനിലയാണ് ഗണ്ണേഴ്സ് വഴങ്ങിയത്. നോട്ടിംഗ്്ഹാമിന്റെ പ്രതിരോധക്കൂട്ടിൽ ആഴ്സണൽ കുടുങ്ങി. കടുത്ത ആക്രമണം നടത്തിയിട്ടും പ്രതിരോധ കോട്ട പൊളിക്കാനായില്ല. സമനില പോയിന്റ് നിലയിൽ ആഴ്സണലിനു വലിയ തിരിച്ചടി നൽകുന്നില്ലെങ്കിലും രണ്ടാമതുള്ള മാഞ്ചസ്റ്റർ സിറ്റിയുമായുള്ള പോയിന്റ് വ്യത്യാസം ഒന്പതാക്കി ഉയർത്താനുള്ള അവസരം നഷ്ടമായി.
പ്രീമിയർ ലീഗിൽ ആഴ്സണൽ തുടർച്ചയായി വഴങ്ങുന്ന രണ്ടാം സമനിലയാണിത്. 22 മത്സരങ്ങളിൽ 15 വിജയത്തോടെ 50 പോയിന്റുമായി ആഴ്സണൽ ഒന്നാം സ്ഥാനത്ത് തുടരുകയാണ്. 13 വിജയവുമായി 43 പോയിന്റ് സ്വന്തമാക്കിയ മാഞ്ചസ്റ്റർ സിറ്റിയാണ് രണ്ടാം സ്ഥാനത്ത്.
ലിവര്പൂളിന് സമനില പൂട്ട്
ഇംഗ്ലീഷ് പ്രീമിയർ ലീഗിൽ ലിവർപൂളിനു തുടർച്ചയായ നാലാം പോരാട്ടത്തിലും സമനില. ബേണ്ലിയാണ് നിലവിലെ ചാന്പ്യൻമാരെ സമനിലയിൽ തളച്ചത്. 0കളിയുടെ 42-ാം മിനിറ്റിൽ ഫ്ളോറിയൻ വിയറ്റ്സിലൂടെ ആൻഫീൽഡിൽ ലിവർപൂൾ മുന്നിലെത്തി. 65-ാം മിനിറ്റിൽ മാർക്കസ് എഡ്വേർഡ്സിലൂടെ ബേണ്ലി സമനില പിടിക്കുകയായിരുന്നു.
ക്രിസ്റ്റൽ പാലസിനെ (1-2) സന്ദർലാൻഡും ടോട്ടനം ഹോട്സ്പറിനെ (1-2) വെസ്റ്റ് ഹാം യുനൈറ്റഡും പരാജയപ്പെടുത്തി. മറ്റൊരു മത്സരത്തിൽ ലീഡ്സ് യുനൈറ്റഡ് 1-0നു ഫുൾഹാമിനെ പരാജയപ്പെടുത്തി.