തിരുവനന്തപുരം: കേരളാ എൻട്രൻസ് കമ്മീഷണറേറ്റ് നടത്തുന്ന എൻജിനിയറിംഗ്, മെഡിക്കൽ, ബിഫാം പ്രവേശനത്തിനായുള്ള അപേക്ഷാ ഫോം ഫീസ് വലിയ തോതിൽ വർധിപ്പിച്ചതായി പരാതി.
2026 ലെ പ്രവേശന പരീക്ഷയ്ക്കായി എൻജിനിയറിംഗ്, മെഡിക്കൽ, ബിഫാം ഇവ മൂന്നിനും അപേക്ഷിക്കുന്ന ഒരു വിദ്യാർഥിക്ക് 2500 രൂപയാണ് അപേക്ഷാ ഫീസായി മാത്രം നല്കേണ്ടി വരുന്നത്.
എൻജിനിയറിംഗ് അപേക്ഷയ്ക്കും ബിഫാം അപേക്ഷയ്ക്കും 925 രൂപ വീതവും മെഡിക്കലും അനുബന്ധ കോഴ്സിനുമുള്ള അപേക്ഷയ്ക്ക് 650 രൂപയുമാണ് ഈടാക്കുന്നത്. എല്ലാ കോഴ്സുകൾക്കുമുള്ള ഫീസ് വെവ്വേറെയാണ് അടയ്ക്കേണ്ടതെന്നാണ് പ്രോസ്പെക്ടസിൽ വ്യക്തമാക്കിയിട്ടുള്ളത്.
കഴിഞ്ഞ വർഷം രണ്ടു വിഷയങ്ങൾക്ക് ചേർത്ത് ഫീസ് അടയ്ക്കാനുള്ള സൗകര്യമുണ്ടായിരുന്നു. ഈ സൗകര്യമാണ് ഇത്തവണ ഇല്ലാതാക്കിയത്. ഫലത്തിൽ പ്രവേശന അപേക്ഷാ ഫീസ് വലിയതോതിൽ വർധിപ്പിച്ചതിനു തുല്യമായി. ഇത് വിദ്യാർഥികളെ ഏറെ പ്രതികൂലമായി ബാധിക്കുമെന്ന പരാതി ഉയർന്നിട്ടുണ്ട്.
ഇന്നലെ മുതലാണ് ഓണ്ലൈനായി കീം എക്സാമിനുള്ള അപേക്ഷ സമർപ്പിക്കാൻ തുടങ്ങിയത് . ഈ മാസം 31 വരെ അപേക്ഷകൾ സമർപ്പിക്കാം. ഓണ്ലൈൻ അപേക്ഷയോടൊപ്പം സമർപ്പിർക്കേണ്ട അനുബന്ധ രേഖകൾ ഫെബ്രുവരി ഏഴുവരെ സമർപ്പിക്കാം. ഏപ്രിൽ 13 മുതൽ 25 വരെയാണ് കീം പരീക്ഷ നടക്കുന്നത്. ജൂണ് മാസത്തോടെ എൻജിനിയറിംഗ്, ബി ഫാം റാങ്ക് പട്ടിക പ്രസിദ്ധീകരിക്കും.
Tags : KEEM 2026 Online application education