ബ്രിസ്ബേൻ: ആഷസ് പരമ്പരയിലെ രണ്ടാം മത്സരത്തിൽ ഓസ്ട്രേലിയയ്ക്ക് എട്ട് വിക്കറ്റ് ജയം. സ്കോർ: ഇംഗ്ലണ്ട് 334 & 241, ഓസ്ട്രേലിയ 511 & 69/2.

നാലാം ദിനം ആറ് വിക്കറ്റ് നഷ്ടത്തിൽ 134 റണ്‍സിന് രണ്ടാം ഇന്നിംഗ്സിൽ ബാറ്റിംഗ് പുനരാരംഭിച്ച ഇംഗ്ലണ്ടിന് 107 റണ്‍സാണ് ഇന്ന് കൂട്ടിച്ചേർക്കാനായത്.

ബെൻ സ്റ്റോക്സും വിൽ ജാക്ക്സും പ്രതിരോധം തീർത്തെങ്കിലും മൈക്കിൽ നിസെർ ഇരുവരെയും വീഴ്ത്തി ഓസ്ട്രേലിയൻ ആധിപത്യം സ്ഥാപിച്ചു. സ്റ്റോക്സ് 152 പന്തിൽ 50 റണ്‍സും ജാക്സ് 92 പന്തിൽ 41 റണ്‍സും നേടി. പിന്നീട് ആർക്കും രണ്ടക്കം പോലും കണ്ടെത്താനായില്ല.

ഓസീസിനായി മൈക്കിൽ നിസെർ അഞ്ച് വിക്കറ്റ് വീഴ്ത്തി. മിച്ചൽ സ്റ്റാർക്കും സ്കോട്ട് ബോലണ്ടും രണ്ട് വിക്കറ്റ് വീതം വീഴ്ത്തി.

64 റണ്‍സ് വിജയലക്ഷ്യവുമായി രണ്ടാം ഇന്നിംഗ്സിൽ ബാറ്റിംഗിനിറങ്ങിയ ഓസീസ് രണ്ട് വിക്കറ്റ് നഷ്ടത്തിൽ ലക്ഷ്യം മറികടന്നു. ഓസീസിനായി ട്രാവിസ് ഹെഡ് 22 റണ്‍സും മാർനസ് ലാബുഷൈൻ മൂന്ന് റണ്‍സും നേടി.

പുറത്താകാതെ ജെയ്ക്ക് വെതറാൾഡും (17) സ്റ്റീവ് സ്മിത്തും (23) ചേർന്ന് ഓസീസിനെ വിജയത്തിലെത്തിച്ചു.

Tags : Ashes Australia vs England Cricket