നാഗ്പുര്: ഐസിസി പുരുഷ ട്വന്റി-20 ലോകകപ്പ് ക്രിക്കറ്റിനു മുന്നോടിയായി ടീം ഇന്ത്യയുടെ അവസാന പരമ്പരയ്ക്ക് ഇന്നു തുടക്കം. ന്യൂസിലന്ഡിന് എതിരായ അഞ്ച് മത്സര ട്വന്റി-20 പരമ്പരയിലെ ആദ്യ മത്സരം ഇന്ന് നാഗ്പുരില് രാത്രി ഏഴിന്.
ട്വന്റി-20 ലോക കിരീടം നിലനിര്ത്താനൊരുങ്ങുന്ന ടീം ഇന്ത്യക്ക്, ലോകകപ്പിനു മുമ്പു ശേഷിക്കുന്ന അവസാന അഞ്ച് മത്സരങ്ങള്ക്കാണ് ഇന്നു തുടക്കം കുറിക്കുന്നത്. ലോകകപ്പില് കളിക്കാനുള്ള പ്ലേയിംഗ് ഇലവനെ നിശ്ചയിക്കുന്ന പരമ്പരകൂടിയാണിതെന്നതും മറ്റൊരു വസ്തുതയാണ്.
ചരിത്രത്തില് ആദ്യമായി ഇന്ത്യയില് ഏകദിന പരമ്പര നേടിയതിന്റെ ആവേശത്തിലാണ് ന്യൂസിലന്ഡ്. ഏകദിന പരമ്പരയ്ക്കിടെ പരിക്കേറ്റ മൈക്കിള് ബ്രെയ്സ്വെല്, ആദം മില്നെ എന്നിവരെ ടീമില് നിലനിര്ത്തിയിട്ടുണ്ട്. പേസര് ക്രിസ്റ്റ്യന് ക്ലാര്ക്കിനെ ആദ്യ മൂന്നു മത്സരങ്ങള്ക്കുള്ള ടീമില് ഉള്പ്പെടുത്തിയതും ശ്രദ്ധേയം.
ഓപ്പണര് സഞ്ജു
മലയാളി വിക്കറ്റ് കീപ്പര് ബാറ്ററായ സഞ്ജു സാംസന് ലോകകപ്പ് ഓപ്പണര് സ്ഥാനം ഉറപ്പിക്കാനുള്ള അവസരമാണ് ഈ പരമ്പര. ശുഭ്മാന് ഗില് തിരിച്ചെത്തിയപ്പോള് നഷ്ടപ്പെട്ട ഓപ്പണിംഗ് സ്ഥാനം, ഗില്ലിന്റെ പുറത്താകലിലൂടെ സഞ്ജുവിനു തിരിച്ചു ലഭിച്ചിരിക്കുകയാണ്. ട്വന്റി-20 ഓപ്പണര് എന്ന നിലയില് ഏറ്റവും മികച്ച രണ്ടാമത്തെ സ്ട്രൈക്ക് റേറ്റുള്ള ഇന്ത്യന്താരമാണ് സഞ്ജു (500ല് അധികം റണ്സുള്ളതില്). ഓപ്പണര് എന്ന നിലയിലെ 18 ഇന്നിംഗ്സില്നിന്ന് 178.02 ആണ് സഞ്ജുവിന്റെ സ്ട്രൈക്ക് റേറ്റ്. അഭിഷേക് ശര്മയ്ക്കു മാത്രമാണ് (190.40) സഞ്ജുവിനേക്കാള് ഉയര്ന്ന സ്ട്രൈക്ക് റേറ്റുള്ളത്.
ഓപ്പണര് എന്ന നിലയില് മൂന്ന് സെഞ്ചുറിയുമുള്ള സഞ്ജുവിന്റെ ബാറ്റിംഗിനെക്കുറിച്ച് എതിരഭിപ്രായമില്ല. എന്നാല്, കഴിഞ്ഞ കുറച്ചുനാളായി വിവിധ ഇടങ്ങളില് പരീക്ഷിക്കപ്പെട്ടതിനുശേഷമാണ് സഞ്ജു ഓപ്പണറായി തിരിച്ചെത്തുന്നത്.
പ്ലേയിംഗ് ഇലവൻ
ലോകകപ്പിനുള്ള ഫസ്റ്റ് പ്ലേയിംഗ് ഇലവനിലെ ഏഴ് പേര് തങ്ങളുടെ സ്ഥാനം ഉറപ്പിച്ചുകഴിഞ്ഞതാണ്. പരിക്കേറ്റു പുറത്തുള്ള തിലക് വര്മയാണ് എട്ടാമനായി ഉണ്ടാകാന് സാധ്യത. ഫാസ്റ്റ് ബൗളര് വേണോ സ്പിന്നര് വേണോ എന്നതാണ് കുല്ദീപ് യാദവിനെ പ്ലേയിംഗ് ഇലവനുള്ളിലും പുറത്തുമാക്കാനുള്ള ചോദ്യം. അഭിഷേക് ശര്മ, സഞ്ജു, സൂര്യകുമാര്, ഹാര്ദിക് പാണ്ഡ്യ, അക്സര് പട്ടേല്, ജസ്പ്രീത് ബുംറ, വരുണ് ചക്രവര്ത്തി എന്നിവരുടെ സ്ഥാനങ്ങള്ക്കാണ് ഇളക്കം സംഭവിക്കില്ലാത്തത്.
തിലവ് വര്മയ്ക്കു പകരമായി ന്യൂസിലന്ഡിന് എതിരായ ആദ്യ മൂന്നു മത്സരങ്ങളില് ശ്രേയസ് അയ്യരെയാണ് ടീമില് ഉള്പ്പെടുത്തിയിരിക്കുന്നത്. എന്നാല്, ലോകകപ്പ് ടീമില് ഉള്പ്പെടാത്ത ശ്രേയസ് അയ്യരെയാണോ, ടീമിലുള്ള ഇഷാന് കിഷനെയാണോ കളിപ്പിക്കുക എന്നതും സുപ്രധാന ചോദ്യം. 2023 ഡിസംബറിനുശേഷം ശ്രേയസ് അയ്യര് ഇന്ത്യന് ജഴ്സിയില് ട്വന്റി-20 കളിച്ചിട്ടില്ല. ഇഷാന് കിഷനാണെങ്കില് 2023 നവംബറിനുശേഷവും.
ഡെത്ത് ഓവറില് അടിച്ചുതകര്ക്കാന് ശിവം ദുബെ, റിങ്കു സിംഗ് എന്നിവരില് ആരാണ്, അര്ഷദീപ് സിംഗ് വേണോ കുല്ദീപ് യാദവ് മതിയോ തുടങ്ങിയ ചോദ്യങ്ങള്ക്കും ഉത്തരം ലഭിക്കാനുണ്ട്.
സൂര്യ @ 100
ക്യാപ്റ്റന് സൂര്യകുമാര് യാദവിന്റെ നൂറാം രാജ്യാന്തര ട്വന്റി-20 മത്സരമാണ് ഇന്നു നടക്കുക. കഴിഞ്ഞ 22 ഇന്നിംഗ്സിനിടെ ഒരു തവണപോലും അര്ധസെഞ്ചുറി നേടാന് മുന് ലോക ഒന്നാം നമ്പര് ബാറ്ററായ സൂര്യകുമാറിനു സാധിച്ചിട്ടില്ലെന്നതാണ് ടീം ഇന്ത്യയെ വിഷമത്തിലാക്കുന്നത്. കഴിഞ്ഞ 22 ഇന്നിംഗ്സിലായി സൂര്യയുടെ ശരാശരി 12.84 മാത്രം. ഇന്ത്യയെ സ്വന്തം നാട്ടില് നടക്കുന്ന ലോകകപ്പില് നയിക്കേണ്ട ക്യാപ്റ്റനെന്ന നിലയില് സൂര്യയില്നിന്ന് ഇരുത്തംവന്ന ഇന്നിംഗ്സുകള് ആരാധകര് പ്രതീക്ഷിക്കുന്നു. ന്യൂസിലന്ഡിന് എതിരായ പരമ്പരയില് അത്തരം ഇന്നിംഗ്സുകള് കാഴ്ചവയ്ക്കാന് സാധിച്ചാല് ടീം ഇന്ത്യക്കും സൂര്യകുമാറിനും ലോകകപ്പിനായി ആത്മവിശ്വാസത്തോടെ ഇറങ്ങാന് സാധിക്കും.
Tags : India New Zealand Twenty20 series cricket